ज्येष्ठ नागरिकाच्या कंपाउंडला आग लावल्याचा आरोप; अज्ञात व्यक्तीविरुद्ध कारवाईची मागणी
पुलगाव येथील अनिलकुमार पाटणी यांची पोलिसांत तक्रार; मालमत्तेच्या सुरक्षेचा प्रश्न ऐरणीवर
पुलगाव प्रतिनिधी जय गुलालकर
पुलगाव येथील आर्वी रोड परिसरात राहणारे ज्येष्ठ नागरिक अनिलकुमार निर्मलकुमारजी पाटणी (वय ६८ वर्षे) यांच्या घराच्या कंपाउंड वॉलला आग लावून नुकसान केल्याची तक्रार पुलगाव पोलीस ठाण्यात दाखल करण्यात आली आहे. या घटनेमागे हेतुपुरस्सर कृत्य असल्याचा संशय व्यक्त करीत तक्रारदाराने संबंधित व्यक्तीविरुद्ध सखोल चौकशी करून कायदेशीर कारवाई करण्याची मागणी केली आहे.
तक्रारीनुसार, अनिलकुमार पाटणी हे ज्येष्ठ नागरिक असून त्यांना अनेक आरोग्यविषयक समस्या आहेत. ते आपल्या घरात एकटेच राहतात. त्यांच्या आर्वी रोड, पुलगाव येथील मालकीच्या प्लॉटवर घर असून, या प्लॉटला संरक्षणासाठी कंपाउंड वॉल बांधण्यात आली आहे.
भरदिवसा कंपाउंड वॉलला आग
तक्रारदाराच्या म्हणण्यानुसार, ११ ऑक्टोबर २०२६ रोजी दुपारी सुमारे २ वाजताच्या सुमारास अज्ञात व्यक्तीने त्यांच्या कंपाउंड वॉलला हेतुपुरस्सर आग लावली. या आगीत कंपाउंड वॉलचे नुकसान झाले असून, संबंधित घटना नैसर्गिक नसून जाणीवपूर्वक घडवून आणल्याचा संशय त्यांनी व्यक्त केला आहे.
यापूर्वीही १४ मार्च २०२५ रोजी रात्री सुमारे १२ वाजता याच ठिकाणी कंपाउंडला आग लावण्यात आल्याची घटना घडली होती. त्यावेळी आग मोठ्या प्रमाणात पसरल्याने अग्निशमन दलाला पाचारण करावे लागले होते. या घटनेबाबत पोलिसांना माहिती देण्यात आल्याचेही तक्रारीत नमूद आहे.
जमिनीवर अतिक्रमणाचा प्रयत्न?
या घटनांमागे आपल्याला त्रास देऊन जागा बळकावण्याचा प्रयत्न असण्याची शक्यता तक्रारदाराने व्यक्त केली आहे. संबंधित जागेवर नगरपरिषदेच्या मालकीच्या नालीचे सिमेंट पाइप टाकण्यात आले असून, हे पाइप कोणी आणि कोणत्या कारणासाठी टाकले, याची माहिती नसल्याचेही त्यांनी तक्रारीत म्हटले आहे. या प्रकारामुळे आपल्या मालमत्तेवर अवैध कब्जा करण्याचा प्रयत्न होत असल्याची शंका त्यांनी व्यक्त केली आहे.
ज्येष्ठ नागरिकाच्या सुरक्षिततेचा प्रश्न
सततच्या घटनांमुळे आपल्या मालमत्तेला आणि जीविताला धोका निर्माण झाला असून, मानसिक त्रास सहन करावा लागत असल्याचे पाटणी यांनी तक्रारीत नमूद केले आहे. या प्रकरणाची सखोल चौकशी करून अज्ञात व्यक्तीचा शोध घ्यावा, संबंधितांविरुद्ध कायद्यानुसार गुन्हा दाखल करावा तसेच घटनास्थळाचा पंचनामा करून योग्य ती कारवाई करावी, अशी मागणी त्यांनी केली आहे.
या तक्रारीच्या प्रती पोलीस उपविभागीय अधिकारी, पुलगाव आणि नगरपरिषदेचे मुख्याधिकारी यांनाही माहितीसाठी व योग्य कार्यवाहीसाठी देण्यात आल्या आहेत.
आता या प्रकरणात पोलीस प्रशासन काय भूमिका घेते आणि ज्येष्ठ नागरिकाला न्याय व सुरक्षितता मिळते का, याकडे परिसरातील नागरिकांचे लक्ष लागले आहे.
