९२ लाखांच्या नव्या शाळा इमारतीचे लोकार्पण; रसुलाबादच्या विद्यार्थ्यांना आधुनिक शैक्षणिक सुविधांची भेट
ग्रामीण भागातील विद्यार्थ्यांना दर्जेदार व आधुनिक शैक्षणिक सुविधा उपलब्ध करून देण्याच्या दिशेने महत्त्वाचे पाऊल टाकत भारतरत्न डॉ. बाबासाहेब आंबेडकर आदर्श शाळा योजना अंतर्गत जिल्हा परिषद, वर्धा यांच्या माध्यमातून उभारण्यात आलेल्या जिल्हा परिषद उच्च प्राथमिक शाळा, रसुलाबाद (ता. आर्वी) येथील नव्या शाळा इमारतीचे लोकार्पण आमदार सुमित वानखेडे यांच्या हस्ते उत्साहात संपन्न झाले.
सुमारे ₹९२ लाखांचा निधी खर्च करून उभारण्यात आलेली ही सुसज्ज व आधुनिक शाळा इमारत ग्रामीण विद्यार्थ्यांसाठी मोठी शैक्षणिक भेट ठरणार आहे. प्रशस्त वर्गखोल्या, सुरक्षित परिसर आणि गुणवत्तापूर्ण शैक्षणिक वातावरणामुळे विद्यार्थ्यांच्या अध्ययनाला चालना मिळणार असून त्यांच्या सर्वांगीण विकासासाठी ही इमारत महत्त्वपूर्ण ठरणार आहे.
यावेळी उपस्थितांना मार्गदर्शन करताना शिक्षण हा समाज परिवर्तनाचा प्रभावी मार्ग असल्याचे सांगण्यात आले. ग्रामीण भागातील विद्यार्थ्यांनाही शहरांप्रमाणे दर्जेदार सुविधा मिळाव्यात, यासाठी शासन सातत्याने प्रयत्नशील असून अशा विकासकामांमुळे शिक्षणाची गुणवत्ता अधिक उंचावेल, असा विश्वास व्यक्त करण्यात आला.
या लोकार्पण सोहळ्यास मान्यवर लोकप्रतिनिधी, ग्रामपंचायत सदस्य, शाळा व्यवस्थापन समितीचे पदाधिकारी, शिक्षकवृंद, भारतीय जनता पक्षाचे पदाधिकारी व कार्यकर्ते तसेच ग्रामस्थ मोठ्या संख्येने उपस्थित होते. कार्यक्रम उत्साहपूर्ण वातावरणात पार पडला.
