‘जिजाऊ’ बसच्या लोकार्पणाने आर्वीच्या राजकारणाला नवी दिशा?
खासदार-आमदार एकाच मंचावर; महाविकास आघाडीतील अंतर्गत अस्वस्थतेच्या चर्चेला उधाण
आर्वी : स्वातंत्र्यदिनाचे औचित्य साधून आर्वी आगारात दाखल झालेल्या पाच आधुनिक सुविधांनीयुक्त ‘जिजाऊ’ बसचे लोकार्पण आमदार सुमित वानखेडे यांच्या हस्ते करण्यात आले. या कार्यक्रमाला खासदार अमर काळे यांची उपस्थिती लाभली. मात्र, लोकार्पण सोहळ्यापेक्षा या दोन्ही लोकप्रतिनिधींची एकाच मंचावरील उपस्थिती आणि त्यांच्यातील राजकीय संवाद याचीच चर्चा आर्वीच्या राजकीय वर्तुळात रंगली.
लोकार्पण सोहळ्यात आमदार सुमित वानखेडे आणि खासदार अमर काळे एकाच मंचावर दिसल्याने आगामी राजकीय समीकरणांबाबत तर्क-वितर्कांना उधाण आले आहे. विशेष म्हणजे, दोन्ही नेते वेगवेगळ्या राजकीय पक्षांचे प्रतिनिधित्व करत असल्याने या भेटीकडे राजकीय दृष्टिकोनातून पाहिले जात आहे.
दरम्यान, काही दिवसांपूर्वी खासदार अमर काळे यांनी पंतप्रधान नरेंद्र मोदी यांच्यासोबत झालेल्या भेटीचे छायाचित्र सोशल मीडियावर शेअर केले होते. त्यानंतर आता आर्वीत आमदार वानखेडे यांच्या कार्यक्रमाला खासदार काळे यांची उपस्थिती दिसून आल्याने या राजकीय घडामोडींचे वेगवेगळे अर्थ काढले जात आहेत.
‘जिजाऊ’च्या निमित्ताने राजकीय चर्चेला वेग
आर्वी विधानसभा मतदारसंघात आमदार सुमित वानखेडे यांच्या नेतृत्वाखाली विविध विकासकामे सुरू असल्याचा दावा करण्यात येत आहे. नव्या ‘जिजाऊ’ बसच्या लोकार्पणामुळे प्रवासी सुविधेत भर पडली असली तरी या कार्यक्रमाने आर्वीच्या राजकारणातील संभाव्य नव्या समीकरणांवर चर्चेला अधिकच हवा दिली आहे.
खासदार अमर काळे आणि आमदार सुमित वानखेडे यांची एकत्रित उपस्थिती ही केवळ विकासकामाच्या कार्यक्रमापुरती मर्यादित होती की त्यामागे आगामी राजकीय घडामोडींचे संकेत आहेत, याबाबत आता राजकीय कार्यकर्त्यांमध्ये चर्चा सुरू झाली आहे.
महाविकास आघाडीच्या गोटातही चर्चेला उधाण
खासदार अमर काळे यांच्या उपस्थितीमुळे महाविकास आघाडीच्या स्थानिक राजकारणातही चर्चेला उधाण आले आहे. आगामी काळात आर्वीतील राजकीय समीकरणे कोणत्या दिशेने जातात, याकडे सर्वांचे लक्ष लागले आहे.
विशेष म्हणजे, आर्वीच्या राजकीय पटावर गेल्या काही काळात विविध घडामोडी घडत असून, नव्या राजकीय समीकरणांची शक्यता नाकारता येत नाही. त्यामुळे ‘जिजाऊ’ बसच्या लोकार्पणाच्या निमित्ताने एकाच मंचावर आलेले खासदार आणि आमदार यांची भेट राजकीय चर्चेचा केंद्रबिंदू ठरली आहे.
विकासाच्या कार्यक्रमातून राजकीय संदेश
मुख्यमंत्री देवेंद्र फडणवीस यांचे निकटवर्तीय आमदार सुमित वानखेडे यांच्या नेतृत्वाखाली आर्वीत सुरू असलेल्या विकासकामांना खासदार अमर काळे यांची उपस्थिती मिळणे, हा केवळ औपचारिक शिष्टाचार की भविष्यातील राजकीय समीकरणांची नांदी, याबाबत आता राजकीय वर्तुळात उत्सुकता निर्माण झाली आहे.
आगामी काळात आर्वीच्या राजकारणात कोणती नवी समीकरणे आकाराला येतात, याकडे राजकीय कार्यकर्त्यांसह नागरिकांचेही लक्ष लागले आहे.
